金仔搞核试兼狂射导弹，玩到咁大真系激嬲咗"侵侵"，仲令到习总变咗磨心。其实，依家成个朝鲜半岛局势，就好似玩紧Showhand咁，一场博奕，系咪已经去到最后一张牌？唔知，但我哋睇到嘅系，"侵侵"已经放咗风，话择咗今个月18日呢个"良辰吉日"做X-DAY，似乎就系要同金仔"晒冷"。事关佢啱啱先开咗另一场赌得更大、赌得更狠嘅牌局，要同整个阿拉伯世界角力，相信有排都唔得闲。
正所谓一念天堂一念地狱，金仔要跟还是冚牌，将决定朝鲜半岛会否再度受战火浸礼嘅命运。事实上，美国从来没有当金仔系傻佬或者狂人，亦都唔觉得佢一直系唔按常理出牌。今年10月，有美国CIA官员喺一个公开讲座中就指出，金仔唔系嗰种肆无忌惮嘅挑衅者，而是"理性的行动派"。即使近日，金仔射导弹射到㷫烚烚，《华尔街日报》引述美国情报同军方官员消息指，假如美国认为金仔唔够理性，早就先下手为强，绝对不会好似依家咁劳神请中国帮忙同金仔讲数。美国情报官员仲咁话，美国评估过后觉得金仔啲导弹亦唔系乱射，至少就无喺中国举行十九大同"侵侵"访问亚洲嗰阵搞事；佢想要嘅系得到世界认可，确保金家王朝屹立不倒，同埋发展北韩经济。
查实，金仔都系用咗老毛当年个招"宁要核子，不要裤子"，觉得有咗核武，全世界都会忌佢三分，自然有筹码同你美国讨价还价。佢连续多次射导弹，咪好似喺度不停加注，撩起美国把火，但美国又因为中国嘅关系唔敢贸然出兵打佢。亦即系金仔觉得自己hold住中国呢张底牌，美国奈佢唔何。佢睇穿中国唔会睇住个北韩呢个"后花园"失火，而任由美国人长驱直入，杀到埋身。最惨咪北韩个啲已经无啖好食嘅平民百姓啰，依家仲要承受国际制裁嘅苦果，真系雪上加霜。
至于侵侵系咪准备发动"斩首战"呢？咁你又要念吓喎，即使烂仔寻仇，都唔会爆响口，话晒俾全世界人知，几时几日嚟郁佢？侵侵分明就系借之前爆料嘅日媒同金仔"晒冷"，大佢：你够胆就继续射导弹，唔系就"冚牌"，同埋喺呢日之前同佢讲和。呢几日就有消息指，金仔已经离开平壤，走咗去中朝边界"避风头"。有报道仲话，嗰度有地道通到中国，方便金仔"着草"。
习总系唔系会继续盲撑金氏政权呢？喺呢一刻，真系好难讲。前几日《吉林日报》无啦啦刊登成版核战防护知识及相关资讯；后又有文件洩露，中国当局仲喺中朝边境设置难民收容点，喺呢个敏感时候，传出呢啲消息系好唔寻常，搞得唔好，分分钟引起民众恐慌，出乱子绝对唔系习总所乐见。呢啲其实系政治讯息，唔系讲俾内地人听，而系想俾金仔同全世界知，中国已经对朝鲜半岛爆发战争，做咗最坏打算，潜台词系中国唔一定阻止美国动武。边个可以排除，中国同美国无私下交易，"做低"金仔？真真假假、虚虚实实，咪系玩Showhand嘅精髓啰。下一步就要睇"文仔"今个月13号访华，同习总讲啲咩。咁样出牌，金仔应该收到。
0
