佔中超过一星期，由遍地开花变成遍地开拖，七国咁乱。即系咁，唔理乜嘢政见都好，都唔能够否认佔中破坏力惊人，对各行各业造成极大打击，再唔收手，全港七百万市民真系揽住一齐陪葬嘅咋。
有眼见o架，攞佔中呢枚「核弹」嚟恐吓中央政府，唔会有效果之余，只会沦为大笑话，但就对香港经济带嚟灾难性影响。先讲港人最关心嘅金融市场，股市连跌数日，唔少投资者鸡毛鸭血，虽然上周五港股尾段略有反弹，但因佔中持续，后市仍然阴霾重重。楼市更加唔在讲，今个黄金周睇楼量急跌两成，成交量亦系○八年金融海啸后新低，问你怕未！正如「东方报业民意调查」显示，两成八受访者担心长期佔中令楼价下滑；两成二直指失信心，买家业主抱观望态度；一成半忧虑对楼市影响进一步扩大。对于股市下挫，三成一认为政治气氛影响金融市场；两成三直斥政治环境令投资者却步；一成九指金融体系受深远影响。
佔中点止造成楼股齐挫吖，其他行业亦嗌晒救命。旅游业首当其冲，除咗内地叫停访港团，澳洲、意大利、日本、加拿大、新加坡等地亦相继发出旅游警示，喺人哋嘅眼中，香港好似变成生人勿近嘅伊拉克咁，你话死唔死吖。旅客望港生畏，导游没工开、没饭食，酒店亦门可罗雀，由「客抢房」变「房等客」，每日损失数十万至过百万元，简直系一壳眼泪。
百货商业僱员总会亦大吐苦水，指最少五十间喺佔领区嘅金舖停业，约千名售货员受影响，佢哋本来每日有数百元佣金，家阵得番底薪咋。仲有呀，佔中令多处交通瘫痪，职业司机开唔到工，手停口停，生计都成问题，简直系哑巴食黄连，有苦自己知。上述民调又显示，四成四受访者担忧经济损失无可估计；一成八恐怕出现倒闭裁员；一成半认为对本港嘅伤害有如沙士。
没错嘞，佔中即系玩火自焚，香港真系伤唔起o架。试谂吓，如果内地把心一横闩水喉，市民连食都没得食，水都没得饮，争取到民主又点吖？最大镬嘅系，佔中搞到唔少学生无法上课。喂，学生停课一两日就话开心啫，无了期停课嘅话，成绩追唔上，影响一生o架。呢，寻日先有一位父亲激动到喺金钟企跳，就知衍生嘅问题绝对唔系讲玩喇。
讲到底，佔中已经令到社会严重撕裂，百业受灾，香港元气大伤，示威人士成日话「自己香港自己救」，实情就系「自己香港自己毁」，搞到神憎鬼厌，都系咎由自取嘅咋。
0
