靠特权致富 官媒批李嘉诚过河拆桥

　　长和系嘅长江基建同电能实业上周合并后，再惹迁册质疑，长和主席李嘉诚竟然被官媒狙击？由新华社批准成立嘅「瞭望智库」，上星期六发表题为〈别让李嘉诚跑了〉嘅文章，批评超人喺中国经济不景时抛售喺中国嘅资产，系对中国当初招安时嘅做法过桥抽板，而且唔可以打算一走了之。唔知系咪心中有气，文章形容超人只系靠特权致富嘅「一介小商人」，但查实如果只系「一介小商人」，官媒何须咁紧张？

　　八方想喺「瞭望智库」网站搵篇文章嚟细味，但已经搵唔到。法国国际广播电台引述呢篇文章时就话，文中强调地产嘅财富要得到官方嘅大力扶持，话李嘉诚等「一介小商人」，绝不能买入时靠特权，卖出时就话系市场经济，批评此举过桥抽板。

　　文章亦指，本港地产行业畸形发展，源于当初中央心中嘅「港人治港」，唔系「香港的升斗小民，而是香港的华商领袖」，实际上系招安政策，代价却系令香港社会嘅结构失去平衡，贫富悬殊日益严重，中产下流日益严重，暗示超人攞咗好多着数，继而仲话中国政府𠵱家要打压富豪、收买底层，扩大政权根基，超人大概系睇穿呢一点，于是打算撤离中国同香港。

　　八方发现只要喺网上输入「别让李嘉诚跑了」几粒字，有关批评超人嘅文章多到睇唔晒，唔少内容、文句极相似甚至一样；至今无跟大队拒撑CY嘅超人，相信对呢啲攻击没有怕。